Sidan 2018 har Fjord1 gradvis gått frå fossilt drivstoff til elektrisk drift. Det er den viktigaste grunnen til at både energibruk og utslepp går ned.

– Elektrifisering er det viktigaste enkelttiltaket vi har. Når vi går frå fossilt drivstoff til straum, reduserer vi både energibruken og utsleppa samtidig, seier energi- og miljøansvarleg i Fjord1, Jan Hovden Eide (biletet under).

Elektrifisering gir store effektar

Før gjekk ferjer på diesel eller gass. No blir stadig fleire samband elektrifiserte – og gevinstane kjem med ein gong:

  • lavare energiforbruk
  • betydeleg lavare utslepp
  • meir stille og effektiv drift

– Elektriske ferjer nyttar energien langt meir effektivt. Det betyr at vi kan frakte like mange passasjerar med mindre ressursbruk, seier Eide.

Smartare drift – meir ut av kvar tur

Elektrifisering er grunnlaget, men optimal drift gir ekstra effekt. Fjord1 jobbar kontinuerleg med å:

  • tilpasse fart og rutemønster
  • bruke automatiserte system for energistyring
  • følgje opp fartøy og ladeinfrastruktur tettare

– Vi jobbar heile tida med å få mest mogleg ut av kvar kilowattime. Små forbetringar på kvar tur gir store utslag over tid, seier Eide.

Heile verdikjeda tel

Utslepp kjem ikkje berre frå sjølve drifta. Dei oppstår òg når fartøy blir bygde og utstyr blir produsert.

Difor arbeider Fjord1 også med å:

  • stille tydelegare krav i innkjøpskjeda
  • samarbeide tettare med leverandørar
  • forlenge levetida til eksisterande fartøy

– Det mest berekraftige fartøyet er ofte det vi allereie har. Oppgraderingar kan redusere både ressursbruk og utslepp betydeleg, seier Eide.

Betre for miljøet – lokalt og globalt

Overgangen til elektrisk drift gir òg merkbare miljøgevinstar langs kysten:

  • mindre utslepp til luft (NOx og SOx)
  • lavare risiko for forureining
  • mindre påverknad på natur og fjordmiljø

Dette bidreg til reinare luft og meir skånsam drift i sårbare område.

Små forskjellar for deg – store gevinstar for miljøet

For passasjerane er det meste som før. Ferja går på tida. Du kjem fram som planlagd.

Men bak kulissane blir drifta stadig meir energieffektiv – driven av elektrifisering og smart teknologi.

– Målet vårt er at kundane skal oppleve den same gode reisa – berre meir berekraftig, avsluttar energi- og miljøansvarleg.