Ombygginga av Måløy ferjekai har starta. Samtidig skal MF Hornelen gjennom ei planlagd ombygging som del av førebuingane til den nye kontrakten.
I samband med ombyggingsarbeidet ved Måløy ferjekai har Skyss stilt krav om at det blir nytta ferje med thruster på sambandet Måløy-Oldeide. For å oppfylle dette kravet må Fjord1 omdisponere fleire fartøy i ein periode.
Frå 13. september blir MF Nordfjord flytta frå sambandet Askvoll-Værlandet til Måløy-Oldeide. Reservefartøy vil i denne perioden trafikkere Askvoll-Værlandet fram til midten av oktober.
Frå midten av oktober blir det gjennomført ei ny omrokkering. Då blir MF Davik flytta frå Askvoll-Fure-Gjervik til Måløy-Oldeide, medan MF Nordfjord vender tilbake til Askvoll-Værlandet. Reservefartøyet blir då sett inn på Askvoll-Fure-Gjervik.
- Omrokkeringane er nødvendige for å sikre trygg drift medan arbeidet på Måløy ferjekai pågår. Vi er klar over at endringane kan påverke regulariteten på enkelte samband i periodar, men dette er den beste løysinga for å sikre eit trygt og stabilt ferjetilbod medan oppgraderingane blir gjennomførte, seier regionleiar Jan Petter Thomsen.
Reisande blir oppmoda til å halde seg oppdaterte på trafikkmeldingar på fjord1.no. Eventuelle avvik og endringar i rutetilbodet vil bli varsla fortløpande.