The Fjords sitt heilelektriske passasjerskip, Future of The Fjords har vunne den prestisjetunge prisen «Årets skip 2018». Prisen vart delt ut under den internasjonale skipsfartsmessa SMM i Hamburg tysdag. Søsterskipet Vision of The Fjords vann den same prisen i 2016.
Future of The Fjords er verdas første heilelektriske karbonfiberfartøy. I tillegg er det utarbeidd og lansert ei unik «powerdock»-ladeløysing til fartøyet, noko som også låg til grunn bak vurderinga av vinnaren «Årets skip 2018».
Administerande direktør i The Fjords, Rolf Sandvik er svært glad for utmerkinga, og takkar spesielt Fjord1 som leverer teknisk og maritime tenester til The Fjords.
- Utan kompetansen frå Fjord1 hadde ikkje dette prosjektet vore mogleg å gjennomføre. Vi er svært stolte over å motta denne anerkjenninga. Prisen betyr mykje både for oss, våre interessentar og den maritime næringa. Fartøyet er i likhet med søsterskipet designa med tanke på omsyn til miljøet, i tillegg til å gje dei reisande ei optimal reiseoppleving på fjordane i verdsarvområda til UNESCO. Vi vil takke alle som har jobba med oss på dette prosjektet, og spesielt våre eigarar Fjord1 ASA og Flåm AS, fortel Sandvik.
Future of The Fjords vart levert i mai i år.